繼續同史友們介紹世界各地嘅珍貴考古發現，唔知史友們有冇幻想過今時今日自己屋企踏緊嘅果塊地板，喺幾千年之後可能會成為後人眼中嘅珍寶呢？而呢件事近排就喺英國發生咗，阿史今次就同大家講一講！

近排喺英國倫敦最高建築物碎片塔與倫敦橋附近薩瑟克地區就出土咗一樣好特別嘅文物，就係一件有1800年歷史嘅羅馬馬賽克（Roman mosaic）地板。嚴格嚟講呢塊羅馬馬賽克地板係由兩塊裝飾精美嘅鑲板組成，其中一部分嘅歷史甚至可以追溯到公元2世紀末至3世紀初。

雖然馬賽克地板聽落好似好普通，但呢塊地板絕對係大有來頭！喺鑲板上唔單止有好多色彩多樣嘅花、扭索紋、所羅門結、幾何圖案，喺呢塊地板附近仲有華麗彩繪牆、硬幣、珠寶等痕跡，連帶落嚟就令考古團隊相信，呢度曾經係有錢人居住嘅地方，而呢塊地板所在之處，好有可能係專門提供信使與官員及其賓客等人使用，真係巴閉！

原圖嚟自網絡